विप्लव नेकपाद्वारा आम जनतालाई कोरोनाविरुद्ध सचेत रहन आग्रह

देशका सबै चिकित्सक एवम् स्वास्थ्य–कार्यकर्ताहरूलाई जनताको सेवामा लाग्न अनुरोध

प्रकाशित मिति : सोम, चैत्र १०, २०७६



दाङ, १० चैत ।
नेपाल कम्युनिस्ट पार्टीले आम जनतालाई कोरोनाविरुद्ध जागरुक हुन आव्हान गरेको छ । पार्टीका महासचिव विप्लवले आज विज्ञप्ति जारी गर्दै सो आव्हान गरेका हुन् । उनले कोरोना भाइरसबाट देश मुक्त नहुँदासम्म सरकारी दमनको प्रतिरोध कारबाही बाहेक अन्य आक्रामक कारबाहीहरू बन्द गरिएको जानकारी गराउदै तत्काल पार्टी कार्यकर्ता र जनसेनाहरूलाई आफू सचेत बन्दै आम जनतालाई कोरोनाविरुद्ध जागरुक हुन निर्देशन समेत दिएका छन ।
महासचिव विप्लवले विज्ञप्तिमा भनेका छन्, ‘कोरोना भाइरसले विश्वमानव समुदायलाई ठूलो क्षति पुर्याएको छ । हालसम्म नेपाली जनतालाई क्षति नपुर्याउनु खुसीको कुरा हो । तर जोखिम कायमै छ । यस्तो जोखिमको परिस्थितिमा सारा देश एकताबद्ध भएर आफ्नो काममा लाग्नुपरेको छ ।’
महासचिव विप्लवको ज्ञिप्तिमा अगाडि भनिएको छ, ‘हाम्रो पार्टी नेपाल कम्युनिस्ट पार्टी कोरोना सङ्क्रमणका विरुद्ध आमनागरिकलाई सचेत रहन आग्रह गर्दछ । यो बेला देशका सबै चिकित्सक एवम् स्वास्थ्य–कार्यकर्ताहरूलाई जनताको सेवामा लाग्न अनुरोध गर्दछ ।’
महासचिव विप्लवको विज्ञप्तिको अन्त्यमा भनिएको छ, ‘तत्काल पार्टी कार्यकर्ता र जनसेनाहरूलाई आफू सचेत बन्दै आमजनतालाई कोरोनाविरुद्ध जागरुक हुन निर्देशन गर्दछ । साथै कोरोना भाइरसबाट देश मुक्त नहुँदासम्म सरकारी दमनको प्रतिरोध कारबाहीबाहेक अन्य आक्रामक कारबाहीहरू बन्द गरिएको जानकारी आमजनसमुदायमा अवगत गराउँछौँ ।’